На 29 ноември православните христијани го одбележуваат празникот на Светиот апостол и евангелист Матеј, кој го напишал Евангелието на еврејски јазик, а подоцна било преведено на грчки. Се смета дека неговото Евангелие е едно од најсеопфатните, опишувајќи настани уште пред раѓањето на Исус, а првично било напишано осум години по воскреснувањето на Христа. До нас дошол само грчкиот превод, додека оригиналот на еврејски е загубен.
Пред да го прифати христијанството, Матеј бил цариник – собирач на даноци, а според преданието, Исус го видел и го повикал да тргне по Него, по што Матеј станал еден од 12-те апостоли. Поради неговата поранешна професија, во народот се верува дека денес е денот кога треба да се исплатат сите заостанати долгови и неплатени даноци. Светиот Матеј се смета за заштитник на цариниците, даночниците, банкарите и економистите.
Чудата на Свети Матеј
По примањето на светиот Дух, Матеј го проповедал Евангелието во Партија, Мидија и Етиопија. Во Етиопија ги крстил сопругата и синот на еден кнез, што го налутило владетелот. Кнезот пратил стражари да го доведат Матеј, но тие не можеле да го видат, бидејќи бил облеан со силна светлина. Кога кнезот самиот тргнал да го бара, апостолот блеснал толку силно што првично го ослепел, но со молитва му овозможил повторно да прогледа – иако само телесно, не и духовно.
Кнезот го заробил Матеј и го подложил на тешки маки, вклучувајќи двапати запален оган на неговите гради, но силата Божја го сочувала жив и неповреден. На крај, апостолот му се помолил на Бога и го предал својот дух. Телото било ставено во оловен ковчег и фрлено во морето, но Свети Матеј се јавил на епископот Платон и го упатил до своето тело. Кога епископот го донел ковчегот, кнезот се крстил и го примил името Матеј.
Се верува дека во целиот свој живот, Свети Матеј избегнувал месо и се хранел со зеленчук, овошје и житарки, оставајќи пример за побожност, трпение и духовна посветеност.
