Докторот Нико Беќаровски упати алармантно предупредување за здравствените ризици од долготрајно седење, кое стана секојдневие за многумина.
„Луѓето кои седат најголем дел од денот имаат 112% поголем ризик за дијабетес тип 2 и 147% поголем ризик за срцев удар“, предупредува Беќаровски. Просечно, денес седиме од 8 до 10 часа дневно, а често и 3-4 часа без никакво помрднување.
Последиците се сериозни:
- Циркулацијата во нозете се намалува веќе после 30 минути
- Мускулите ја губат чувствителноста кон инсулинот
- Гликозата постапно поспоро влегува во клетките
- Ензимот lipaza опаѓа до 90%, а триглицеридите растат
- Долготрајното седење го скратува животниот век исто колку и 15 цигари дневно
И тоа не е сè – крвта се успорува, внатрешниот слој на крвните садови почнува да ја губи функцијата, мозокот добива помалку кислород и го губи фокусот, а телото преминува во режим на чување на енергијата.
Што препорачува докторот?
- Раздвижување 2–5 минути секои 30 минути
- Кратки прошетки по јадење
- Движење додека зборувате на телефон
- Искористување на рекламите на ТВ за кратки паузи
- Паркирање подалеку од дестинацијата
- Учениците да се тераат да се раздвижат помеѓу часовите
Беќаровски дополнува дека ултра процесираната храна дополнително го зголемува ризикот од метаболен синдром, срцеви болести и дебелина, особено кај оние кои се неактивни. „Џабе е еден час во теретана ако 9 часа пред или потоа ги отседите. Целта е да се движите – 10.000 чекори дневно за здрав живот“, порача тој.
