Вистинска драма се одвивала попладнево во скопската населба Аеродром, откако автомобил се запалил додека бил во движење.
Според информациите од Министерството за внатрешни работи, настанот бил пријавен во СВР Скопје во 17:56 часот. Станува збор за патничко возило „Фолксваген Поло“, сопственост на 61-годишен скопјанец, кое од засега непознати причини се запалило додека се движело.
На местото веднаш интервенирала Бригадата за противпожарна заштита на Град Скопје, која успеала навреме да го локализира и изгасне пожарот.
За среќа, според првичните информации, во инцидентот нема повредени лица, но на возилото е причинета материјална штета.
Надлежните служби ќе ги утврдуваат причините поради кои дошло до избувнување на пожарот.
Инцидентот предизвика внимание кај минувачите и возачите кои се затекнале во близина, а пожарот беше брзо ставен под контрола благодарение на навремената интервенција на пожарникарите.
