Во експлозија во изнајмен стан на улицата Косовска во Белград, најверојатно загинал македонски државјанин додека подготвувал експлозивна направа со голема разорна моќ, наменета за криминални цели, јавува Курир. Сè уште се чека официјална потврда за идентитетот, а полициски служби, Безбедносно-информативната агенција и Вишото јавно обвинителство во Белград работат на случајот.
Според оперативни информации, експлозивот бил наменет за дилер на дрога во Белград, а целата мрежа е поврзана со криминални групи. Експлозијата се случила во среда вечерта, разнесувајќи преградни ѕидови, подови, оштетувајќи прозорци и автомобили.
Соседите откриле дека станот се издавал како живеалиште. Спасувачките екипи, предводени од Бојан Јагодиќ, заменик-командант на Противпожарната и спасувачка бригада, изјавиле дека при пристигнувањето на местото на настанот се урнал ѕидот меѓу два стана, паднал таванот и немало пожар, а пронајденото лице било тешко повредено.
Јагодиќ објасни дека нивната постапка во вакви ситуации е прво да се утврди дали има повредени или преживеани и дека секогаш следат строги процедури при такви експлозии.
