На 28 ноември 2025 година, на Граничниот премин Стар Дојран, три лица од грчко државјанство беа лишени од слобода поради основано сомнение за недозволено држење, изработување и тргување со оружје и експлозивни материи, согласно член 396 од Кривичниот законик.
При извршена гранична контрола за влез во Република Северна Македонија, во координација на полициски службеници од Регионалниот центар за гранични работи Југ, царински службеници и полицијата од Фронтекс, кај тројца грчки државјани беа пронајдени и одземени околу 200 непријавени патрони ловечка муниција, распределени во три одделни случаи.
Првиот случај се случи околу 10:20 часот, кога при контрола на патничко моторно возило „Дајхатсу Териос“ управувано од Х.С.(38), пронајдени се над 130 патрони сокриени на повеќе места во возилото.
Околу 11:20 часот, во патничко моторно возило „Хонда“ со грчки национални ознаки управувано од K.K.(76), беа пронајдени 24 патрони.
Последниот случај се случи околу 16:30 часот, кога во патничко моторно возило „Сузуки Витара“ управувано од Т.P.(62), беа откриени над 40 патрони.
Сите три случаи се предмет на натамошна истрага од страна на МВР.
