По 11 дена штрајк со глад, Дијана Хрка го напушти шаторот поставен пред српското Народно собрание. Ветераните кои се собраа пред парламентот за да ѝ дадат поддршка за ТВ Н1 изјавија дека Хрка заминала по приватна работа и дека очекуваат наскоро да се врати.
Нејзиното заминување ги вознемири присутните граѓани кои сите 11 дена ѝ даваа морална поддршка во нејзината борба.
Попладнево, Хрка изјави дека нејзината здравствена состојба се влошила — чувствува малаксаност, но одлучила засега да не прими инфузија и да го продолжи штрајкот со глад.
Во знак на солидарност, граѓаните вечерва организираа заедничка молитва за нејзиното здравје и запалија свеќи пред парламентот.
Дијана Хрка, мајката на трагично починатиот Стефан — кој загина при падот на бетонската настрешница на железничката станица во Нови Сад минатата година — го започна штрајкот со глад на 2 ноември, ден по големиот комеморативен митинг во Нови Сад.
Таа бара надлежните органи да ги изведат пред лице на правдата сите осомничени за трагедијата, да бидат ослободени незаконски приведените студенти и обвинетите лица, како и да се распишат вонредни парламентарни избори.
